Միացյալ Նահանգների Մասաչուսեթս նահանգում գտնվող Ուոթերթաուն քաղաքի հանրային գրադարանում հունիսի 12-ի երեկոյան «Զաբել Եսայանին որոնելիս» խորագրով 40 րոպե տեւողությամբ փաստագրական ֆիլմ կցուցադրվի: «The Armenian Weekly» պարբերականի հաղորդմամբ, ժապավենը հայազգի ակնառու գրողի իրադարձություններով հարուստ կյանքն է նկարագրում:
«Զաբել Եսայանին որոնելիս» ֆիլմի պրեմիերան 2011թ.' Բոստոնում է կայացել: Հայ կանանց միջազգային կազմակերպության' ժապավենից ոգեշնչված անդամները Եսայանի գրքերից երկուսը' «Սիլիհդարյան այգիներ» վերտառությամբ հուշերն ու «Վտարված հոգիս» վեպն անգլերեն են թարգմանել: Վերջերս հրատարակված գրքերը մեծ հեղինակություն են ձեռք բերել ընթերցողների շրջանում: Միաժամանակ ֆիլմը եւս մեկ անգամ ցուցադրելու խնդրանքներ են ստացվել:
Գրող, ակտիվիստ եւ ֆեմինիստ Զաբել Եսայանը (1878–1943) 19-րդ դարի վերջի եւ 20-րդ դարի մեկնարկի հայ մտավորականության ամենաակնառու ներկայացուցիչներից մեկն է: Նրա տարբեր գրական ժանրերի' մեծ հեղինակություն վայելած ստեղծագործությունները ժամանակաշրջանի աղետալի իրադարձություններն էին արտացոլում: Այդուհանդերձ, դրանց գոյության մասին այսօր շատ քչերն են հիշում: Փաստագրական ֆիլմը Եսայանի հիշատակի վերածննդին ուղղված առաջին քայլն է: